وانا في تانية اعدادي كدا

وانا في تانية اعدادي كدا.. كنت معجب ببنت في المدرسة المشتركة بتاعتنا.. ونفسي أكلمها بس كنت محرج أوي.. فلقيتها في يوم واقفة مع شلة كبيرة والصبيان بيكلموها فافتكرت انها كدا خانتني وسابتني..

وكنت وقتها مهووس بالشعر والحاجات دي.. فكتبت ورقة وحطتها في حاجة زي الجواب.. وحطتها في الفسحة في شنطتها مكتوب فيها ايه بقى..

تركتُ جميع النّاس فيك محبةً
‏فيا ليت بعض النّاس لي تركوك

َوده شعر كنت واخده من كتاب عندي لبهاء الدين زهير.. المهم يعني البت ما فهمتش الكلام وقالت للبنات صحباتها فقالوا للأبلة.. فالأبلة فضلت مبلمة شويا كدا.. وقالت مين اللي كاتب الكلام ده.. يقول ما يخفش.. يقول والله ما هعمله حاجة.. بس يا جبل ما يهزك ريح ما نطقتش طبعا ..

المهم الابلة جابت سولتب وعلقت الورقة دي فوق السبورة.. فكان كل واحد يدخل يبص لها ويسأل هو مين اللي كاتب الكلام الحلو ده.. وخلاص كان فصلنا مشهور بالورقة دي وعارفين ان فيه واحد بيكتب شعر للبنات بقى وكدا..

بعدها  بمدة قعدت أقرأ الكتاب بتاع الشعر ده عايز أكتب منه  للبنت أي حاجة عشان أقولها ازاي تعملي كدا فيا.. فلقيت في نفس الكتاب بيقول

وَفي النَفسِ حاجاتٌ إِلَيكَ كَثيرَةٌ
أَرى الشَرحَ فيها وَالحَديثُ يَطولُ

عجبني الكلام فكتبته وحطيته نفس ما عملت في الأول..

فالبنت راحت قالت لنفس الأبلة بعد ما حطيت الورقة على التختة بتاعتها وشوية كلام عامي كدا كنت كاتبه مع البيت ده .. اللي هو حبي قدامك كل يوم على السبورة وانتي مش حاسه بيه  ..

الأبلة قالت يا ولاد اللي كاتب الكلام الحلو ده سقفوله.. فكله سقف إلا أنا.. ونسيت خالص.. مبسوط انهم كلهم بيسقفوا ليا بقى ..
شويا لقتها قرأت الجواب اللي مكتوب على الحيطة والجديد وقالت سقفوله تاني.. كله سقف إلا أنا..

بس يا مؤمن.. هي لاحظت اني ما سقفتش قالتلي احمد.. اكتبلي الكلام ده هنا كدا بخطك .. كتبته.. وطبعا نفس الخط.. وبعد كدا لقيت خرزانة نازلة عليا في اوضة الناظر.. وكل واحد يدخل من الاساتذة عند الناظر يقرأ الورقتين يقول ايه الحلاوة دي ويمشي.. واي ابلة تقرأ تضربني وتطلع..

ما انساش ابدا الأبلة وهي بتضربني.. بتقولي وفي النفس حاجات إليك كثيرة.. حاجات إيه يا صايع.. قول يله حاجات ايه.. حاجات ايه دي اللي في نفسك يا بايظ.. والخرزانة نازلة عليا..

عملولي استدعاء ولي أمر فأمي بعتت خالي وقتها يشوف هببت إيه .. فخالى وهو مرجعني البيت ، امي بتقوله عمل إيه .. قالها ده ممسوك بحاجات في المدرسة ربنا يستر على عيالنا ..  أمي تقولي يا فضيحتي ماسكينك بحاجات وماحدش اداني فرصة أصلا أشرح .. أنا حتى فاكر ان اختي جت يومها بعدي من المدرسة قالت فيه إيه أمي قالتلها أخوك اتمسك بحاجات في المدرسة .. وجاتلي الأوضة قالتلي هو بجد ممسكوك بحاجات في المدرسة ؟
وفضلوا مطلعين عليا فترة الاعدادي كلها احمد أبو حاجات ..

من يومها بقى ولحد دلوقتي ،  لو لقيت أي حد بيسقف على أي حاجة بسقف معاه من غير ما أفكر.. ولحد دلوقتي انا ما أعرفش حاجات ايه والله..